उपमुख्यमंत्री अजित पवार यांच्याकडून शेतकऱ्यांना कर्जमाफीचे संकेत | Karj Mafi Maharashtra 2025

Karj Mafi Maharashtra 2025: राज्याचे उपमुख्यमंत्री आणि अर्थमंत्री अजित पवार यांनी नुकतेच स्पष्ट केले की, सरकारने शेतकऱ्यांना कर्जमाफी न देण्याचा कोणताही निर्णय घेतलेला नाही. योग्य वेळी शेतकऱ्यांना कर्जमाफी दिली जाईल, असे संकेत त्यांनी दिले. अकोला आणि वाशीम जिल्ह्यांच्या संयुक्त विकास आढावा बैठकीनंतर आयोजित पत्रकार परिषदेत ते बोलत होते. याप्रसंगी राज्यमंत्री इंद्रनील नाईक, आमदार संजय खोडके, आमदार अमोल मिटकरी आणि आमदार किरण सरनाईक उपस्थित होते. पवार यांनी नमूद केले की, बैठकीत अकोला आणि वाशीम जिल्ह्यातील जिल्हा नियोजन समितीच्या निधी खर्चाचा आढावा घेण्यात आला. मागील वर्षी केवळ ९०% निधी (२७० कोटी रुपये) खर्च झाला, जो अपेक्षित नव्हता. निधी खर्चात दिरंगाई आणि समन्वयाचा अभाव दिसून आला.

Karj Mafi Maharashtra 2025

यावर्षी मात्र, जिल्हा नियोजन निधी वेळेत खर्च करण्याच्या स्पष्ट सूचना प्रशासनाला देण्यात आल्या आहेत. या बैठकीत केंद्र आणि राज्य सरकारच्या विविध योजनांचाही आढावा घेण्यात आला. राज्य सरकार स्थापन झाल्यानंतर देण्यात आलेल्या १०० दिवसांच्या कृती कार्यक्रमाचा आढावा घेण्यात आला असून, आता १५० दिवसांचा नवीन कार्यक्रम आखण्यात आला आहे.

उपमुख्यमंत्री पवार यांनी खरीप हंगामासाठी बी-बियाणे आणि खतांची उपलब्धता तसेच पीककर्ज वाटपाचा आढावा घेतल्याचे सांगितले. बी-बियाणे पुरेशा प्रमाणात उपलब्ध आहेत, मात्र डीएपी खताची कमतरता आहे. यासंदर्भात मंत्रिमंडळात चर्चा झाली असून कृषी विभागाच्या अधिकाऱ्यांना योग्य उपाययोजना करण्याचे निर्देश देण्यात आले आहेत.

बी-बियाणे किंवा खतांची लिंकिंग (एकासोबत दुसरे उत्पादन सक्तीने विकणे) करत असल्यास, नागरिकांनी तात्काळ जिल्हाधिकाऱ्यांना माहिती द्यावी. अशा प्रकारच्या प्रकरणांमध्ये दोषींवर कठोर कायदेशीर कारवाई केली जाईल, असा इशाराही त्यांनी दिला. दुग्ध विकासासाठी केंद्र आणि राज्याच्या चांगल्या योजना उपलब्ध असून, शेतकऱ्यांनी पूरक व्यवसायातून आपले उत्पन्न वाढवण्यासाठी या योजनांचा लाभ घ्यावा, असे आवाहनही त्यांनी केले.