Post Office Saving Schemes: आता पोस्ट ऑफिसमधील विविध बचत योजनांमध्ये कागदपत्रांशिवाय, पूर्णपणे डिजिटल पद्धतीने गुंतवणूक करणे शक्य झाले आहे. यासाठी आधार ई-केवायसी सुविधेची सुरुवात करण्यात आली आहे, आणि यात सार्वजनिक भविष्य निर्वाह निधी (PPF) आणि सुकन्या समृद्धी योजनांचा समावेश आहे.
ग्राहकांना आता ऑनलाइन स्वरूपात डिपॉझिट व्हाउचर आणि अर्ज करता येणार आहेत. त्यामुळे या योजना डिजिटल तसेच पारंपरिक पद्धतीने सुरू करण्याचा पर्याय आपल्याला मिळेल. महत्त्वाचे म्हणजे, अर्जावर कोठेही आधार क्रमांक दिसू नये, यासाठी सर्व पोस्ट ऑफिस आणि सीबीएस केंद्रांना स्पष्ट सूचना देण्यात आल्या आहेत.
यापूर्वी पोस्ट विभागाने आधार बायोमेट्रिकच्या मदतीने पोस्ट ऑफिस बचत बँक खाते उघडण्याची सुविधा सुरू केली होती. आता या सुविधेचा विस्तार मासिक बचत योजना, मासिक उत्पन्न योजना (MIS), मुदत ठेव (TD), किसान विकास पत्र (KVP) आणि राष्ट्रीय बचत प्रमाणपत्र (NSC) यांसारख्या योजनांपर्यंत करण्यात आला आहे.
बचत खाते उघडण्याची प्रक्रिया पोस्टातील कर्मचाऱ्यांच्या मदतीने सुरू होते. ई-केवायसीसाठी आधार क्रमांकाच्या आधारे आपल्या बोटांचे ठसे घेतले जातात. त्यानंतर खातेदाराचे नाव, योजनेचा प्रकार आणि गुंतवणुकीची रक्कम सिस्टीममध्ये नोंदवली जाते. अंतिम प्रक्रिया पूर्ण करण्यासाठी पुन्हा बायोमेट्रिक पडताळणी केली जाते. या प्रक्रियेमुळे खातेदारांना वेगळे पैसे भरण्याची आवश्यकता भासणार नाही.
आधारची एक खास बाब, बायोमेट्रिक लॉक/अनलॉकची सुविधा आहे. यामुळे तुमची बायोमेट्रिक माहिती सुरक्षित राहते आणि गरजेनुसार ती तात्पुरती बंद किंवा सुरू करता येते. या नवीन डिजिटल पद्धतीमुळे पोस्टाच्या बचत योजनांमध्ये गुंतवणूक करणे अधिक सोपे, जलद आणि सुरक्षित झाले आहे. चला तर मग, ह्या योजनांचा लाभ घेऊया.